काठमाडौँ । सरकारले विपद् प्रभावित क्षेत्रमा ३५ अर्ब रुपैयाँ खर्च गर्न सक्ने गरी रकम जम्मा भएको छ । प्रधानमन्त्री दैवी प्रकोप उद्धार कोष र प्रधानमन्त्री राहत कोषमा रहेको रकम तथा विश्व बैंकले दिएको २५ अर्बसहित ३५ अर्ब रुपैयाँ सरकारले परिचालन गर्न सक्ने अर्थ मन्त्रालयले जनाएको छ ।
प्रधानमन्त्री दैवी प्रकोप उद्धार कोष र प्रधानमन्त्री राहत कोषमा राहत रकम जम्मा हुने क्रम सुरु भएको छ । अर्थ मन्त्रालय स्रोतका अनुसार हालसम्म सानो–सानो रकममा सहयोग भएको छ । ठुला रकमको प्रतिवद्धता आइरहेका छन् ।
नेपालका लागि विश्व बैंकका नेपाल निर्देशक डेभिड सिस्लेनले आपतकालीन सहयोगका रूपमा बुधबार नै २५ अर्ब रुपैयाँ सहयोग गर्ने प्रतिवाद्धता जनाए अनुसार सरकारलाई रकम प्राप्त भइसकेको छ । गैरआवासीय नेपाली संघले पाँच करोड राहत कोषमा सहयोग गर्ने निर्णय गरिसकेको छ । यस्तै कुमारी बैंकले तीन करोड रुपैयाँ सहयोग गरेको छ ।
राष्ट्रिय स्वतन्त्र पार्टीले ५० लाख र एक्स्ट्रम इनर्जी ड्रिङ्क्सले एक करोड रुपैयाँ राहत कोषमा जम्मा गर्ने प्रतिवद्धता जनाएका छन् ।
विभिन्न देशबाट पनि सहयोगको प्रतिवद्धता आइरहेका छन् । भारतले दुई लट गरी ४७.५ टन बराबरको राहत सामाग्री नेपाललाई हस्तान्तरण गरिसकेको छ भने थप राहत दिने प्रतिवद्धता जनाएको छ । भारतका प्रधानमन्त्री नरेन्द्र मोदीले नै बुधबार प्रधानमन्त्री वालेन्द्र शाह (बालेन)लाई फोन गरेर भारत नेपालको साथमा रहेको प्रस्ट पार्दै हरेक प्रकारको सहयोग गर्न भारत तयार रहेको प्रतिवद्धता जनाएका छन् । आफ्नो प्रतिवद्धता अनुसार भारतले राहत सहयोग पठाउन सुरु गरेको छ ।
यता, चीन र अमेरिकाले पनि राहत सहयोगका लागि प्रतिवद्धता जनाएका छन् । नेपालस्थित अमेरिकी दूतावासका अनुसार अमेरिकी विदेश मन्त्रालयले क्याथोलिक रिलिफ सर्भिसेसलाई प्रदान गरेको वैश्विक अनुदानमार्फत ५ लाख अमेरिकी डलर (करिब ७ करोड ६० लाख रुपैयाँ) को सहायता उपलब्ध गराउने प्रतिवद्धता जनाएको छ ।
सो रकमले बाढीबाट प्रभावित समुदायहरूलाई आपत्कालीन आश्रय र राहत सामग्रीका साथै पानी, सरसफाइ र स्वच्छतामा मद्दत पुग्ने दूतावासले जनाएको छ । नेपालको रसुवा जिल्लामा आएको विनाशकारी बाढीमा परी ज्यान गुमाएकाहरूको परिवार र आफन्तजनमा अमेरिकाले समवेदना पनि प्रकट गरेको छ ।
अमेरिकी विदेश मन्त्रालयले नेपालमा आएको विपत्तिलाई नजिकबाट नियालिरहेको बताएको छ । राहत तथा उद्धारका लागि त्यस क्षेत्रमा एक विपत् प्रतिकार्य सल्लाहकार परिचालन गर्ने दूतावासले जनाएको छ ।
नेपालका लागि चिनियाँ राजदूत झाङ माओमिङले राहत सामग्री तथा नगद सहयोगका लागि समन्वय गरिसकेको बताए । राजदूत झाङले चीन र नेपाल दुवैतर्फ मानवीय तथा अन्य भौतिक क्षति पुगेको उल्लेख गर्दै यो कठिन घडीमा चीन नेपालको साथमा उभिएको बताए ।
नेपालका लागि तत्काल आपत्कालीन राहत सामग्री र नगद सहयोगको समन्वय गरिसकिएको र आगामी दिनमा पनि यथाशक्य थप सहयोग उपलब्ध गराइने उनले सामाजिक सञ्जालमार्फत प्रतिबद्धता जनाएका छन् ।
