काठमाडौँ । २०२६ को विश्वकप अमेरिका, क्यानडा र मेक्सिकोमा ऐतिहासिक समारोहका साथ सुरु हुँदैछ। उत्तर अमेरिकाभरि आयोजना हुने ऐतिहासिक
उद्घाटन समारोहहरूसँगै २०२६ को विश्वकप सुरु हुनेछ।
तीनवटा आयोजक राष्ट्रहरूमा एकैसाथ प्रतियोगिताको सुरुवात हुन लागेको यो पहिलो पटक हो। अमेरिका, मेक्सिको र क्यानडाले आधिकारिक रूपमा इतिहासकै सबैभन्दा ठुलो विश्वकपको सुरुवात गर्नेछन्।
अमेरिकाले सन् १९९४ मा र मेक्सिकोले सन् १९७० तथा १९८६ मा प्रतियोगिता आयोजना गरिसकेका छन्। क्यानडाले भने पहिलो पटक यो प्रतियोगिता आयोजना गर्दैछ। तीनवटै देश मिलेर यो प्रतियोगिताको उद्घाटन गर्नेछन्।
यस विश्वकपमा १६ वटा आयोजक सहरहरूमा कीर्तिमानी १०४ वटा खेलहरू खेलाइनेछन्। यो विश्वव्यापी प्रतियोगिता बिहीबार, जुन ११ मा मेक्सिकोमा हुने उद्घाटन खेलबाट सुरु भई आइतबार, जुलाई १९ मा न्युयोर्कमा हुने फाइनल खेलसम्म चल्नेछ।
उद्घाटन समारोहबारे अहिलेसम्म प्राप्त जानकारीहरू यस प्रकार छन्:
- विश्वकपको उद्घाटन समारोह कस्तो हुनेछ?
मेक्सिको, क्यानडा र अमेरिकामा आयोजना हुने तीनवटा अन्तरसम्बन्धित समारोहहरू एउटै साझा विषयवस्तुमा आधारित छन्। यी राष्ट्रहरूलाई एकजुट गराउने र प्रत्येक देशको संस्कृति, पहिचान र सिर्जनात्मक प्रतिभा प्रदर्शन गर्ने उद्देश्य राखिएको छ।
प्रत्येक कार्यक्रम आयोजक राष्ट्रको उद्घाटन खेल सुरु हुनुभन्दा ९० मिनेट अगाडि सुरु हुनेछ।
यी समारोहहरूको निर्माण मार्को बालिचले गरिरहेका छन्। उनी २०२६ को शीतकालीन खेलकुद र अन्य प्रमुख अन्तर्राष्ट्रिय खेलकुद कार्यक्रमहरूसहित धेरै ओलम्पिक उद्घाटन समारोहका रचनात्मक निर्देशक हुन्। प्रत्येक कार्यक्रमको आफ्नै छुट्टै विशेषता हुनेछ। सबै तीनवटै कार्यक्रमहरू फुटबलले सीमापारिका मानिसहरूलाई एकजुट गर्न सक्ने क्षमतामा केन्द्रित साझा विषयवस्तुद्वारा जोडिनेछन्।
प्रत्येक आयोजक राष्ट्रले समारोहमा आफ्नै दृश्य शैली प्रस्तुत गर्नेछन्। क्यानडालाई सांस्कृतिक विविधता, मेक्सिकोलाई ‘पापेल पिकाडो’ (कागज काटेर बनाइने परम्परागत कला) र अमेरिकालाई बालिचको शब्दमा ‘अत्यन्तै चम्किलो र उज्यालो कप’ मार्फत प्रस्तुत गरिनेछ।
फिफा अध्यक्ष जियानी इन्फान्टिनोले भनेका छन्, ‘फिफा विश्वकप विश्वले साझा गर्ने एउटा क्षण हो। यसको सुरुवात हामी कसरी गर्छौं भन्ने कुराबाट हुन्छ।’
उनले थपे, ‘मेक्सिको सिटीबाट सुरु भएर आगामी दिनहरूमा टोरन्टो र लस एन्जलसमा हुने यी समारोहहरूले सङ्गीत, संस्कृति र फुटबललाई यस्तो तरिकाले एकै ठाउँमा ल्याउनेछन्, जसले प्रत्येक राष्ट्रको व्यक्तित्व र यस प्रतियोगितालाई चिनाउने एकता दुवैलाई झल्काउनेछ। यो साँच्चै विश्वव्यापी उत्सव सुरु गर्ने एउटा शक्तिशाली तरिका हो।’
‘द एथलेटिक’का अनुसार मेक्सिको सिटीमा हुने समारोह करिब १६ मिनेट ३० सेकेन्डसम्म चल्ने अनुमान गरिएको छ। टोरन्टो र लस एन्जलसका कार्यक्रमहरू करिब १३ मिनेट चल्ने तय गरिएको छ।
प्रस्तुतिहरू सकिएपछि टिमहरूलाई खेलअघिको वार्मअपका लागि मैदान उपलब्ध गराइनेछ। त्यसपछि म्याचडे प्रोटोकल अनुसारका समारोहहरू, जसमा खेलाडी मैदानमा आउने र आधिकारिक परिचय गराइने कार्यक्रमहरू खेल सुरु हुनुभन्दा २५ मिनेट अगाडि सुरु हुनेछन्। यी कार्यक्रमहरू करिब १३ मिनेटसम्म चल्ने अनुमान गरिएको छ।
- उद्घाटन खेलमा को-को खेल्दैछन्?
प्रतियोगिताको पहिलो खेलमा मेक्सिकोले दक्षिण अफ्रिकासँग खेल्नेछ। यो खेल मेक्सिको सिटीमा उद्घाटन समारोह सकिएपछि हुनेछ।
क्यानडाले टोरन्टोमा बोस्निया र हर्जगोभिनासँग खेल्नेछ। क्यानडाको पुरुष राष्ट्रिय टोलीले आफ्नो घरेलु मैदानमा खेल्न लागेको यो पहिलो विश्वकप खेल भएकाले यसले ऐतिहासिक महत्त्व राख्छ।
लस एन्जलसमा हुने समारोहपछि अमेरिकाले आफ्नो पहिलो खेलमा पाराग्वेको सामना गर्नेछ।
विश्वकप उद्घाटन समारोह कहिले र कहाँ हुँदैछन्?
मेक्सिकोले सन् २०१० को उद्घाटन खेलको झल्को दिने गरी दक्षिण अफ्रिकासँगको खेलभन्दा ९० मिनेट अगाडि मेक्सिको सिटी स्टेडियम (पहिलेको एस्टाडियो एज्टेका) बाट प्रतियोगिताको सुरुवात गर्नेछ।
समारोहमा रैथाने कलाकारहरू, समकालीन लोक प्रस्तुतिहरू र ‘पापेल पिकाडो’ को परम्परागत कलामार्फत मेक्सिकन संस्कृतिको उत्सव मनाइने अपेक्षा गरिएको छ।
फिफा विश्वकपको आधिकारिक एल्बममा समावेश अलेजान्ड्रो फर्नान्डेज, बेलिन्डा, ड्यानी ओसन, जे बाल्भिन, लिला डाउन्स, लस एन्जलस अजुलेस र माना जस्ता कलाकारहरूले प्रस्तुति दिने अपेक्षा गरिएको छ। यस कार्यक्रममा दक्षिण अफ्रिकी गायिका तथा गीतकार टाइला पनि सहभागी हुनेछिन्।
शकिराले पनि बुर्ना बोयसँगै इटालियन भाषामा ‘लेट्स गो’ वा ‘कम अन’ अर्थ लाग्ने आफ्नो गीत ‘डाई डाई’ प्रस्तुत गर्ने अपेक्षा गरिएको छ। शकिराले जुलाई १९ मा हुने फिफा विश्वकपको पहिलो फाइनल हाफटाइम शोमा म्याडोना र के-पप ब्यान्ड बीटीएससँगै मुख्य प्रस्तुति दिने तय भएको छ।
अधिकारीहरूले मेक्सिको सिटीमा जुन ११ लाई सार्वजनिक बिदा घोषणा गरेका छन्। विद्यालयहरू बन्द रहनेछन् भने रोजगारदाताहरूलाई घरबाटै काम गर्ने व्यवस्था मिलाउन प्रोत्साहित गरिएको छ। स्टेडियम क्षेत्रमा टिकट भएका दर्शक, मान्यता प्राप्त सञ्चारकर्मी र आधिकारिक व्यक्तिहरूलाई मात्र प्रवेश दिइनेछ।
क्यानडाको समारोह क्यानडा र बोस्निया तथा हर्जगोभिनाबिचको खेलअघि टोरन्टो स्टेडियममा हुनेछ। टोरन्टोमा उद्घाटन समारोह स्थानीय समयानुसार दिउँसो १:३० बजे सुरु हुनेछ।
समारोह दर्शकहरूलाई ‘क्यानडाभरिको यात्रा’ गराउन डिजाइन गरिएको विशेष काउन्टडाउनबाट सुरु हुनेछ। यसले क्यानडालाई एक छेउबाट अर्को छेउसम्म प्रतिबिम्बित गर्ने क्षणहरूलाई उजागर गर्नेछ।
सांस्कृतिक विविधता (मोजाइक) को विषयवस्तुमा केन्द्रित यस कार्यक्रमले सङ्गीत र प्रस्तुतिमार्फत क्यानडाको विविधतालाई झल्काउनेछ। जसमा एलानिस मोरिसेट, एलेसिया कारा, एलियाना, जेसी रेयेज, माइकल बुबले, नोरा फतेही, सञ्जय, भेज्ड्रिम र विलियम प्रिन्स जस्ता कलाकारहरू सहभागी हुनेछन्।
समारोहलगत्तै बोस्निया र हर्जगोभिनासँग हुने खेल अत्यन्तै महत्त्वपूर्ण छ। यो क्यानडाको पुरुष राष्ट्रिय टोलीले घरेलु मैदानमा खेल्ने पहिलो फिफा विश्वकप खेल हुनेछ।
फिफा अध्यक्ष जियानी इन्फान्टिनोले टोरन्टोको समारोह ‘क्यानडाको पहिचानको शक्तिशाली प्रतिविम्ब’ हुने बताएका छन्। क्यानडा फुटबलको सबैभन्दा ठूलो मञ्चमा उत्रँदै गर्दा यो ‘गर्व, एकता र उत्साहको क्षण’ हुने उनको भनाइ छ।
अमेरिकाले पाराग्वेसँग खेल्नुअघि लस एन्जलस स्टेडियममा आफ्नो उद्घाटन उत्सव आयोजना गर्नेछ।
समारोहमा ठुला आकारका दृश्यहरू, मनमोहक कथा वाचन र केटी पेरी, फ्युचर, अनिता, लिसा, रेमा र टाइला जस्ता विश्वव्यापी कलाकारहरूको प्रस्तुति रहनेछ।
फिफा अध्यक्ष जियानी इन्फान्टिनोले अमेरिकाको सांस्कृतिक विविधता र जीवन्त आप्रवासी समुदायलाई प्रतिबिम्बित गर्न यी कलाकारहरू छनोट गरिएको बताए। यसले विश्वव्यापी पप संस्कृति, सङ्गीत र मनोरञ्जनमा अमेरिकाको महत्त्वपूर्ण प्रभावलाई प्रदर्शन गर्नेछ।
