काठमाडौं, माघ २५। प्रधानमन्त्री सुशीला कार्कीले आईसीसी टी–२० विश्वकप अन्तर्गत पहिलो खेलमा नेपाली क्रिकेट टोलीको प्रदर्शन तारिफयोग्य भएको बताएकी छन्।
जित र हार खेलको नियम भएको उल्लेख गर्दै उनले सामाजिक सञ्जालमार्फत भनेकी छन् कि “आशा अझै बाँकी छ”।
खेलमा, मुम्बईको वांखडे स्टेडियममा इंग्ल्यान्डले नेपालसामु १८५ रनको लक्ष्य प्रस्तुत गरेको थियो। लक्ष्य पछ्याउँदा नेपालले २० ओभरमा ६ विकेट गुमाएर १८० रन मात्र बनाउन सक्यो। अन्तिम ओभरमा जितका लागि १० रन आवश्यक पर्दा, सेट ब्याटर लोकेश बम क्रिजमा भए पनि नेपाल लक्ष्य पुरा गर्न सफल भएन।
प्रधानमन्त्री कार्कीले भनिन्:
“जित–हार खेलको नियम हो। हामीले कसरी खेल्यौं, त्यो महत्त्वपूर्ण हो। आज नेपाली टोलीको प्रदर्शन तारिफयोग्य छ। आशा अझै बाँकी छ।”
उनले आफैं बालुवाटारस्थित निवासमा बसेर खेल हेरेकी थिइन्।
